Oibrithe Deonacha
Tá obair dheonach mar chroílár d’eiteas craoltóireachta Raidió na Life mar stáisiún raidió pobail (sainspéise) ón am a bunaíodh an stáisiún. Is ar bhonn deonach a oibríonn craoltóirí uile an stáisiúin, mar aon le dream mór de thaighdeoirí, cúntóirí, léiritheoirí, teicneoirí srl. Is iad ár n-oibrithe deonacha nó ár saorálaithe croílár an stáisiúin. Gan iad ní bheadh an stáisiún ann.
Cén fáth go ndéanfá obair dheonach le Raidió na Life?
- Taithí Chraoltóireachta. Trí obair dheonach a dhéanamh le Raidió na Life tá tú ag fáil taithí chraoltóireachta den chéad scoth. Is iomaí duine cáiliúil a thosaigh a gcuid gairmeacha craoltóireachta le Raidió na Life, ina measc duine de na léitheoirí nuachta is cáiliúla sa tír seo, Sharon Ní Bheoláin. Leathanach Staire
- Deis le Clár Raidió a Chur i Láthair. Ní gach duine a fhaigheann deis clár raidió a chraobhscaoileadh ar fud chathair agus contae Átha Cliath, gan trácht ar an domhan mór. Tugtar an deis sin duit anseo i Raidió na Life. I bhfocail shimplí, seó raidió de do chuid féin a bheith agat!
- Forbairt & Sásamh Phearsanta. Foghlaimíonn tú a lán, ní hamháin faoin chraoltóireacht, ach fút féin agus faoi dhaoine eile, ó obair dheonach a dhéanamh i Raidió na Life. Tá sásamh iontach ag baint le hobair dheonach a dhéanamh freisin, go háirithe in áit chomh funkyáilte le RnaL!
